Mayın 14-də Elm və Təhsil Nazirliyi İqtisadiyyat İnstitutunda i.f.d Elnur Zeynalovun sədrliyi ilə Gənc Alimlər və Mütəxəssislər Şurasının növbəti toplantısı keçirilib.
İnstitutun “Aqrar sektorun iqtisadi problemləri” şöbəsinin elmi işçisi Lalə Cabbarlı "Azərbaycan Respublikasında aqrar sahənin liberallıq - dirijistlik səviyyəsinin qiymətləndirilməsi” mövzusunda təqdimatla çıxış edib. Gənc tədqiqatçı Azərbaycanda aqrar sektorun dövlət tərəfindən tənzimlənməsi, kənd təsərrüfatına dövlət dəstəyi siyasəti, dövlət büdcəsindən fermerlərə ayrılan dotasiyalar, güzəştli kreditlər, müxtəlif təşviq mexanizmləri, onların ölkədə aqrar sektorun inkişafına təsirlərinin təhlili və qiymətləndirilməsi üzrə apardığı tədqiqatlar barədə danışıb. L.Cabbarlı İqtisadiyyatın solluğu (sağlığı) indeksinin metodologiyası əsasında apardığı qiymətləndirmələr əsasında Azərbaycanda aqrar sahənin liberallıq - dirijistlik səviyyəsini qiymətləndirməyə çalışıb. Bununla yanaşı ölkəvi müqayisələr də aparılıb. Məruzəçi qeyd olunan məsələlərlə bağlı tədqiqatın əsas nəticələrini təqdim edib.
İqtisadiyyat İnstitutunun baş direktoru, professor Nazim Müzəffərli, İnstitutun icraçı direktoru, dosent Famil Rüstəmov aparılan müzakirələrə qatılıblar, tədqiqatçıya tədqiqatın dərinləşdirilməsi üzrə öz tövsiyələrini veriblər.
Tədbirdə mövzu ilə bağlı maraqlı müzakirələr aparılıb, suallar cavablandırılıb, təklif və tövsiyələr səsləndirilib.
