Mayın 19-da Elm və Təhsil Nazirliyi İqtisadiyyat İnstitutu ilə Əmək və Əhalinin Sosial Müdafiəsi Nazirliyinin tabeliyində fəaliyyət göstərən Əmək Bazarı və Sosial Müdafiə Məsələləri üzrə Milli Observatoriya arasında onlayn formatda işgüzar görüş keçirilib. Tədbirdə hər iki qurumun bir qrup aparıcı məsul şəxsləri və mütəxəssislər iştirak ediblər.
Görüşdə ETN İqtisadiyyat İnstitutunun elmi katibi, i.e.d. Leyli Allahverdiyeva təmsil etdiyi elmi müəssisənin əsas fəaliyyət istiqamətləri, fundamental elmi tədqiqat mövzuları, elmi tədbirlər, dövlət və hökumət qurumlarının sifarişi ilə həyata keçirilən layihələr, hökumətin müvafiq işçi komissiyalarında ekspert qismində iştirak və s. barədə geniş məlumat verib.
Əmək Bazarı və Sosial Müdafiə Məsələləri üzrə Milli Observatoriyanın İdarə Heyətinin sədr müavini Elçin Süleymanov Milli Observatoriyanın əsas fəaliyyət istiqamətləri barədə danışıb, birgə əməkdaşlıq imkanlarını qeyd edib.
Digər çıxış edənlər - ETN İqtisadiyyat İnstitutunun şöbə müdiri, professor Rəsmiyyə Abdullayeva, Milli Observatoriyanın Təlimlərin təşkili və layihələrlə iş departamentinin müdiri Əli Mahmudov, Əmək bazarı və sosial müdafiə sahəsi üzrə tədqiqat departamentinin müdiri Ayşəm Balayeva və digərləri iki qurum arasında birgə əməkdaşlığın konkret mexanizmlərindən danışıblar.
Görüşdə yaxın vaxtlarda İqtisadiyyat İnstitutu ilə Milli Observatoriya arasında imzalanması nəzərdə tutulan əməkdaşlıq memarandumu müzakirə olunmuşdur.
